Дежурен јавен обвинител од Основното јавно обвинителство – Велес изврши увид во семејна куќа во која утрово околу 2 часот е извршено кривично дело убиство.
Настанот се случил кога 46-годишниот С.В. со тврд предмет, најверојатно, чекан, им ја скршил влезната врата на своите соседи, влегол во собата каде што спиела ќерката и ја удрил со чекан по главата, при што ја повредил.
Во тој момент во собата влегле родителите на девојката, па осомничениот и нив ги удрил со чеканот по главата нанесувајќи им тешки телесни повреди, од кои подоцна таткото починал.
По викотниците за помош, во собата дошле и братот на починатиот со сопругата, кои живееле на другиот кат од куќата, па осомничениот со чеканот и ним им нанел тешки телесни повреди.
По извршување на делото, осомничениот се вратил дома и на социјалните мрежи објавил статус во кој известува дека ги убил „своите монструми“. Веднаш е приведен и од страна на надлежен обвинител до Основен суд – Велес ќе биде доставен предлог за определување мерка притвор против него.
Истовремено, јавниот обвинител издаде наредба да се изврши обдукција на телото на починатиот, како и наредба за подигање на сите траги и материјални докази од местото на настанот.
