Лидерите на земјите-членки на Европската Унија, по неколкунеделни блокади, на денешната вонредна седница постигнаа договор за финансиска помош за Украина.
Иако долго време се најавуваше дека Унгарија повторно ќе стави вето и ќе ја блокира помошта од 50 милијарди евра, се чини дека тоа не се случи.
Информацијата дека е постигнат договор ја потврди и претседателот на Европскиот совет, Шарл Мишел.
„Имаме договор. Сите 27 лидери се согласија за дополнителен пакет поддршка за Украина од 50 милијарди евра во рамките на буџетот на Европската Унија. Тоа значи стабилно и долгорочно финансирање за Украина“, рече Мишел.
Исто така, Мишел нагласи дека Европската Унија го презема водството и одговорноста во поддршката на Украина.
Знаеме што е во прашање и колку е важна оваа одлука“, рече Мишел.
Во пресрет на самата седница, бројни функционери во разговори со медиумите го посочија прашањето за Унгарија и Виктор Орбан како клучен проблем за постигнување единство во ЕУ. Се зборуваше и за алтернативни решенија со кои Унгарија би се избегнала во одлуката, но се чини дека немало потреба од тоа.
Оптимист во пресрет на средбата беше и високиот претставник на ЕУ за надворешна политика, Жузеп Борељ, кој рече дека е убеден оти Унгарија нема да го попречува процесот.
„Едно е да не се учествува, друго е да се опструира. Унгарија не го попречува процесот“, заклучи Борељ.
Засега не се знае дали Унгарците во меѓувреме добиле одредени гаранции или ветувања од Брисел, но повеќе информации за ова секако ќе се знаат подоцна при обраќањето на Виктор Орбан.
Украинскиот претседател Володимир Зеленскиј изјави дека им е благодарен на лидерите на ЕУ што отворија нов фонд од 50 милијарди евра за неговата земја.
„Многу е важно што одлуката ја донесоа сите 27 лидери, што уште еднаш го докажува силното единство на ЕУ“, рече тој. „Континуираната финансиска поддршка на ЕУ за Украина ќе ја зајакне долгорочната економска и финансиска стабилност, што не е помалку важно од воената помош и притисокот од санкции врз Русија“, додаде тој.
Се огласи и Кремљ обвинувајќи ги САД дека се обидуваат „да го префрлат товарот на поддршката на Украина на рамениците на европските даночни обврзници“.
Во врска со дискусиите на самитот на ЕУ за понатамошна рунда поддршка за Украина, Русија рече дека Киев и Западот „ќе продолжат да имаат проблеми“. Беше кажано и дека Западот се обидува да ја демонизира Русија за да ја направи да изгледа како непријател.
