Актерот Вил Смит ја напушти американската Академија на филмски уметности и науки откако на доделувањето на Оскарите му удри шлаканица на комичарот Крис Рок, пишува Variety.
„Ја изневерив довербата на Академијата, на останатите номинирани и на победниците им ја ускратив приликата да слават и да бидат прославени поради исклучителната работа. Го напуштам членството во Академијата и ќе ги прифатам сите идни последици кои Одборот ги смета за соодветни“, стои во изјавата на актерот.
Со ова, тој призна дека неговиот чин го засени доделувањето на Оскарите.
„Листата на оние кои ги повредив е долга и ги вклучува Крис Рок, неговото семејство, моите сакани пријатели, сите присутни и светската публика која настанот го следеше од дома“, напиша Смит.
На 94. Доделување на Оскарите, Смит му удри шлаканица на Рок, кој се пошегува на сметка на кратката фризура на Џејда Пинкет Смит, која всушност боледува од алопеција. Смит подоцна изјави дека реагирал емотивно подари шегата направена на основа на здравствената состојба на неговата сопруга.