Рускиот претседател Владимир Путин доби официјална покана да ја посети Белата Куќа во почетокот на 2019 година, најави денеска националниот секретар за безбедност на САД, Џон Болтон.
Болтон денеска зборуваше на прес-конференцијата во Џорџија и рече дека закажувањето на средбата ќе биде дополнително планирано, но дека официјалната покана важи за периодот по први јануари следната година.
„Го поканивме претседателот Путин во Вашингтон по први јануари наредната година и имаме намера да имаме консултации во текот на целиот ден кога тој ќе дојде во посета. Засега не знаеме кој датум ќе се одржи средбата, но тоа ќе биде дополнително планирано“, изјави Болтон.
Американскиот претседател Доналд Трамп годинава одржа самит во Хелсинки на кој беше присутен и Владимир Путин. Таму Трамп го покани Путин на средба која требаше да се случи оваа есен, но потоа средбата беше одложена.
Засега не е познато дали Владимир Путин ќе ја прифати поканата, но претставничкото тело на САД се надева дека средбата ќе се одржи и со тоа ќе се подобрат односите помеѓу двете земји.