Две лица во Гана починаа од екстремно смртоносниот вирус марбург, па здравствените институции се подготвуваат за потенцијална епидемија. Лекарите рекоа дека пациентите развиле симптоми како што се дијареа, треска, гадење и повраќање.
Претставникот на Светската здравствена организација во Гана, Френсис Касоло изјави дека здравствените служби се на терен и ја истражуваат ситуацијата и подготвуваат одговор за евентуална епидемија.
„Тесно соработуваме со државата за да откриеме случаи на инфекција, да следиме контакти и да бидеме подготвени да го контролираме ширењето на вирусот“, рече Касоло.
Ако се потврди дека две лица починале од вирусот, тоа ќе биде втор пат марбург да биде откриен во Западна Африка, по помалите случаи во Гвинеја минатата година.
Марбург вирусот е најсмртоносниот вирус во светот, имајќи предвид дека, според Светската здравствена организација, убива до 90% од заразените. Во моментов нема лек за оваа болест.
Почетните симптоми вклучуваат силна главоболка, висока температура, дијареа, абдоминална болка и повраќање. Со текот на времето, симптомите стануваат поизразени. По неколку дена, многу пациенти имаат внатрешно крварење или крварење од отворите на телото како што се устата, очите и ушите.
Марбург вирусот се пренесува на луѓе кои се изложени на рудници или пештери каде што се наоѓаат лилјаците. После тоа, вирусот се шири преку директен контакт со телесни течности на заразени лица или површини и материјали кои биле во контакт со тие течности.
Се работи за вид на вирус кој припаѓа на семејството Filoviridae. Тоа е животински хеморагичен вирус со облик на хокејски стап, прстен или латинска буква U. Филовирусите се РНК вируси со полиморфен, понекогаш филаментозен вирион со дијаметар од 150-300 нанометри. Геномот се состои од едноверижна РНК.
Последен пат кога вирусот излезе од Африка беше во 2008 година кога се појави во Уганда и се се прошири во Холандија и САД, за среќа со малку заразени и само еден смртен случај. Најголема епидемија беше забележана во 2004 и 2005 година кога во Ангола беа потврдени 252 заразени од кои дури 227 починаа.
