На синоќешниот натпревар од ФА купот помеѓу велшки Рексам и Шефилд Јунајтед главниот судија покажа црвен картон, но сите ги зачуди неговата нетипична форма - беше округол наместо правоаголен.
Во рамките на 16-ина финалето од најстарото натпреварување во фудбал во светот, англискиот ФА куп, главниот судија Дин Вајтстоун во 71. минута го исклучи од игра гостинскиот играч Даниел Џебисон, но кога го извади картонот за да го официјализира исклучувањето, сите останаа вчудоневидени.
Не само присутните на стадионот, кои со чудење коментираа дали навистина картонот е округол или само така им се причинило, туку и оние крај малите екрани беа изненадени од ваквиот преседан.
Округлиот црвен картон, сепак, има иста улога како и стандарниот правоаголен. Од англиската судиска организација пристигна објаснување зошто се одлучиле да ја променат формата, а целта е да им се помогне на одредени луѓе.
Имено, судиската организација сака да им излезе во пресрет на луѓето кои поради тританомалија не можат да ја разликуваат црвената од жолтата боја и сината од зелената. Токму разликувањето црвена и жолта е клучно при покажувањето на картоните, а не само меѓу гледачите, туку и кај играчите има далтонисти.
„Округлиот црвен картон е воведен за да им се помогне на играчите кои не ги разликуваат боите“, стои во објаснувањето.
Натпреварот Рексам - Шефилд Јунајтед заврши 3:3, па согласно правилата на ФА купот тие ќе мора да одиграат нов натпревар за да го одлучат победникот, овој пат на теренот на екипата која на првиот натпревар била гостин.
Се разбира, ова е само тестирање на ваквиот црвен картон, а за негова целосна употреба дозвола треба да даде ФИФА. Доколку ваквата промена биде прифатена, округол ќе биде само црвениот, додека жолтиот картон ќе ја задржи правоаголната форма. На тој начин далтонистите ќе можат да ги разликуваат според формата, а не според бојата.