Танзанија е една од ретките земји каде што во текот на поголемиот дел од пандемијата е минимизирано значењето на коронавирусот, а властите одбија да го запрат ширењето на вирусот со воведување на заштитни мерки. Од тие причини расте незадоволство во земјата, заедно со смртните случаи, кои им се припишуваат на воспаленија на бели дробови, пишува британски The Guardian.
Весникот наведува дека луѓето се свесни дека вирусот е присутен, дека има многу случаи на болест и смрт, но дека не е дозволено тоа да се објавува во јавноста.
– COVID-19 ги убива луѓето и гледаме многу такви случаи, но не смееме да зборуваме на таа тема, изјави за The Guardian лекар од државната болница во најголемиот град во Танзанија, Дар ес Салам, кој како и многумина побарал да не биде спомнуван од страв од можна казна.
The Guardian пренесува дека претседателот на Танзанија, Џон Магуфули, континуирано го минимизира вирусот, па дури и кога соседните држави ги затворија границите и спроведуваа полициски час и локдаун.
Земјата последен пат ги објави податоците за случаи со заболени и умрени од коронавирус во април 2020 година, истовремено кога претседателот Магуфули откри дека тајно испратил разни предмети на тестирање од COVID-19, од кои папаја, препелица, коза и други биле позитивни, пренесува лондонскиот весник.
