Генералниот секретар на ОДБК лично ќе ја предводи мисијата откако Ереван го обвини Баку за последните воени судири.
Организацијата на Договорот за колективна безбедност, скратено ОДБК, денеска објави дека ќе испрати своја мисија за да ја процени ситуацијата во јужниот Кавказ и да предложи решение за тензиите помеѓу Ерменија и Азербејџан. Мисија ќе ја предводи генералниот секретар на ОДБК, Станислав Зас од Белорусија, а таму ќе биде и рускиот генерал Анатолиј Сидоров, кој е главен на стручниот воен тим од овој блок.
ОДБК е руски пандан на НАТО и вклучува вкупно 6 земји на чело со Русија. Останатите членки се Белорусија, Ерменија, Казахстан, Киргистан и Таџикистан, сите поранешни советски републики. Азербејџан, кој е втората страна во конфликтот во спорниот регион Нагорно-Карабах, не е членка на блокот. Азербејџан, заедно со Грузија беа членки, но во 1999 година истапија од блокот навајувајќи желба за влез во НАТО. Узбекистан исто така беше член, но напушти во 2012.
Премиерот на Ерменија, Никол Пашинјан, преку видео-конференција ги информирал сојузниците од блокот за новите престрелки со азербејџанската војска во кои изминативе денови загинаа 49 ерменски и 50 азербејџански војници, и побарал интервенција од ОДБК.
ОДБК досега инсистираше на мирно решавање на конфликтот, без своја воена интервенција иако една нејзина членка е инволвирана во судирите, а според официјален Ереван токму Ерменија е нападнатата страна. Таквиот став на блокот беше на инсистирање на рускиот претседател Владимир Путин, кој и покрај истапувањето на Азербејџан од ОДБК, одржува добри односи со оваа земја.
Во статутот на ОДБК постои Член 4 кој секоја земја-членка може да го активира доколку воено е нападната, а тој член е идентичен како правилото на НАТО кое вели дека „кога една членка е нападната, тоа е напад врз сите“. Засега е непознато дали Ерменија го активирала Членот 4.
