Kапитенот на кошаркарската репрезентација на Македонија, Војдан Стојановски, натпреварите во Талин ги гледа како тест за можностите на тимот, но во исто време и можност повеќе за собирање на потребното искуство за помладите играчи кои се дел од националниот тим.
Македонија отпатува на предолимпискиот турнир, каде ќе игра против селекциите на Израел, Естонија и на Чешка.
„Ова сум го кажал во доста прилики, и тоа останува и за оваа. Ние како екипа, кои сме тука во Талин, ќе дадеме сѐ од себе да се прикажеме во едно добро светло и да стигнеме до еден добар резултат. Што се однесува до противниците, станува збор за доста добри репрезентации. Во изминатиот период видовме со кој потенцијал ќе дојдат тука во Талин. Оттука сметам дека ова ќе биде еден добар тест, да видиме колку можеме во еден ваков состав, во кој има неколку измени. Но, во исто време да биде и едно искуство плус за оние помладите играчи во репрезентацијата пред кои следуваат и други вакви, слични предизвици“, истакнува капитенот Војдан Стојановски.
Според програмата, турнирот кој се игра во градската арена „Тондираба“ во Талин, од 15 часот, ќе го отвори дуелот меѓу домаќинот Естонија и Чешка. Три часа подоцна, од 18 часот, Македонија ќе игра против репрезентацијата на Израел.
Првопласираните две репрезентации од турнирот во Талин ќе се пласираат на завршниот турнир во Полска. Победникот од Полска ќе избори пласман во квалификациите за пласман на Олимпијадата во Париз.
Директни преноси од натпреварите на Македонија од Талин ќе пренесува Канал 5.
Распоред на настпревари
12 август (сабота)
15:00: Чешка - Естонија
18:00: Македонија - Израел
13 август (недела)
15:00: Израел - Чешка
18:00: Естонија -Македонија
14 август (понеделник)
слободен ден
15 август (вторник)
15:00: Чешка - Македонија
18:00: Израел - Естонија
