На Египет му претстојат важни квалификациски натпревари за пласман на Мундијалот, но Ливерпул инсистира „Фараоните“ да играат ослабени без својот најголем адут.
Деновиве се води вистинска војна помеѓу премиерлигашот и Фудбалската асицијација на Египет. Египќаните решија да проговорат и на јавноста ѝ соопштија со какви сопки се справуваат во обидот Мохамед Салах да го имаат на располагање за претстојните мундијалски квалификации.
Прозорецот на ФИФА на почетокот од септември е резервиран за сите репрезентации ширум светот. „Фараоните“ имаат два натпревара и тоа против Ангола на први дома и потоа на гости кај незгодниот Габон на петти. Но, ќе мора да се снаоѓаат без Салах.
Луверпул одлучи да го искористи новото британско правило за да не го пушти Салах да се јави на повикот на татковината. Имено, поради рестрикциите со цел спречување на ширењето на коронавирусот, секој повратник од Египет мора потоа да оди во десетдневен карантин. Тоа не значи дека Салах не смее да игра за Египет, туку дека на Ливерпул не му одговара тој потоа да биде ставен во карантин.
„Египетската фудбалска асоцијација продолжува да прави напори да ги донесе сите интернационални репрезентативци во националниот тим за да играат во квалификациите за Светското првенство. Се трудиме тие да бидат изземени од рестрикциите за патувања воведени од државите во кои играат, а поради коронавирусот“, почнува соопштението на Египќаните.
„Примивме допис од Ливерпул каде се извинуваат за недостапноста на нивниот фудбалер, Мохамед Салах. Тие се правдаат со мерките кои важат во Англија и кои имаат за цел да спречат ширење на коронавирусот, а со кои повратниците од одредени држави имаат задолжителна самоизлација за период од 10 дена по враќањето во Англија. Англискиот клуб напиша дека се надева дека ние тоа ќе го разбереме. Истиот изговор им го испратиле и на други репрезентации“, се дополнува во соопштението.
Но, Ливерпул и претходно му бранеше на Салах да игра за репрезентацијата, дури и кога немаше мерки. Последен пат беше летово кога не го пушти да настапи на Олимписките игри во Токио, иако за таму немаше никакви рестрикции.
Сепак, можно е Ливерпул делумно да попушти и да му дозволи на Салах да игра за Египет, но само на вториот натпревар против Габон. Имено, оваа африканска земја не е на црната листа на Обединетото Кралство, па по враќањето играчот нема да мора да оди во карантин.
Салах е капитен на Египет и досега има одиграно 70 натпревари и постигнато дури 45 голови.