На Волстрит вчера, првиот работен ден од новата година, значително паднаа индексот S&P 500 и Nasdaq, што главно беше резултат на наглиот пад на цените на акциите на технолошките гиганти Tesla и Apple. Dow Jones загуби 0,03 отсто, на 33.136 поени, додека S&P 500 се лизна за 0,40 отсто, на 3.824 поени, а индексот Nasdaq загуби 0,76 отсто, на 10.386 поени.
Слабиот почеток на годината на најголемата светска берза во голема мера се должи на падот на цената на акцијата на Tesla за 12 отсто, откако производителот на електрични автомобили објави пониски од очекуваните испораки во последниот квартал од минатата година.
Притисокот врз S&P 500 и Nasdaq индексот е и резултат на падот на цената на акциите на Apple за 3,7 отсто, по извештаите во азиските медиуми за слабата побарувачка за iPhone-и и намалувањето на производството во Кина. Значително паднаа и цените на акциите во енергетскиот сектор, во просек за 3,6 отсто, бидејќи цената на нафтата падна поради стравувањата на трговците од слабеење на економскиот раст, а со тоа и на побарувачката.
„Минатата година беше ужасна“
Така, во првиот работен ден од новата година продолжи падот на цените на акциите, откако минатата година индексот S&P 500 потона за повеќе од 19 отсто, што беше негов најголем пад од светската финансиска криза во 2008 година.
Ова беше резултат на агресивните зголемувања на каматните стапки од страна на американската централна банка за да се ограничи инфлацијата, која во средината на годината го достигна највисокото ниво во последните 40 години.
„Минатата година беше ужасна за берзата. Причините за тоа не исчезнаа само затоа што започна новата година. Инвеститорите се уште се загрижени за инфлацијата и зголемувањето на каматните стапки од страна на ФЕД. Додека ситуацијата не стане појасна, тешко е да се очекуваат значителен пораст на пазарот“, вели Мајкл Џејмс, директор во Wedbush Securities.
Се чека нова седница на ФЕД
Инфлациските притисоци се намалија во последните месеци, поддржувајќи ги надежите дека ФЕД наскоро ќе го заврши циклусот на зголемување на стапките, но инвеститорите стравуваат дека економијата ќе западне во рецесија оваа година и каматните стапки ќе останат високи подолго од очекуваното.
Затоа, во среда, инвеститорите ќе се фокусираат на објавување на записникот од минатогодишниот состанок на ФЕД, што би можело да им обезбеди на инвеститорите нови насоки.
И на европските берзи цените на акциите вчера пораснаа втор ден по ред. Лондонски FTSE индекс зајакна за 1,37 отсто, на 7.554 поени, додека франкфуртски DAX порасна за 0,80 отсто, на 14.181 поен, а париски CAC 0,44 отсто, на 6.623 поени.
