„Home Alone“ е еден од апсолутните новогодишно-божикни класици, а многу луѓе не знаат дека филмот речиси и да не се снимел затоа што студиото Warner Bros се откажало од проектот.
Филмот од 1990 година повторно е актуелен (како и секоја година овој период) и се гледа одново и одново низ светот за време на Божик и Нова година. Овој филм е синоним за новогодишните празници.
Затоа, тешко е да се замисли дека филмот бил многу блиску до тоа да не се сними и дека бил речиси укинат уште во претпродукција. Филмот го следи Кевин (Маколи Калкин) кој случајно е оставен дома додека неговото семејство оди на божикен одмор.
Како што се вели во документарниот филм „The Movies That Made Us: Home Alone“, кога сценаристот Џон Хјуз го однел својот проект во продукциската канцеларија на Warner Bros, тие рекле дека можат да го снимат филмот за 10 милиони долари и очекуваат достоен повраток од половина вложени средства.
Меѓутоа, како што се натрупувале трошоците за филмот, се испоставило дека за снимањето ќе бидат потребни 14 милиони долари, а откако го дознале тоа, Warner Bros решиле да го прекинат проектот.
Во налетот на емоции, на актерите и екипата истото утро им било кажано дека продукцијата е затворена и дека се без работа. За среќа, подоцна им било кажано дека 20th Century Fox го зеле филмот и сакале да го одработат снимањето до крај.
Тимот потоа се дал на работа за да ја најде вистинската локација за секоја сцена, работејќи „деноноќно“ за да најде иконска куќа „која претставува специфичен вид на американски живот од високата средна класа“, според Хјуз.
Меколи Калкин очигледно однапред бил избран за улогата на Кевин, во улога што ќе го прослави. Бил избран откако директорите на кастингот ја виделе неговата изведба заедно со Џон Кенди во „Uncle Buck“ и сфатиле дека е правиот за улогата.
Филмот заврши со заработка од 285 милиони долари на кино благајните, а со текот на годините што следеа, го зацврсти своето место како еден од најголемите новогодишно-божикни филмови на сите времиња.
