Скопје, 18 февруари 2021 (МИА) – Од 85.179 лица кои досега се заинтересирани да примат вакцина, 38.000 се над 70-годишна возраст, објави Министерството за здравство.
Вакцинацијата во земјава почна вчера со имунизација на 202 здравствени работници.
Министеството за здравство укажува дека сите вакцини се безбедни и развиени на безбедни платформи.
-Со нив, секој ден сме чекор поблиску до крајот на пандемијата предизвикана од COVID-19, објави МЗ на официјалната Facebook страница.
Филипче на средба со пензионерите – Од голема важност да се вакцинираат против коронавирусот бидејќи се во најризичната група
На барање на пензионерите од Скопје, денеска министерот за здравство Венко Филипче оствари средба во Сојузот на здруженија на пензионери.
– На средбата зборувавме за прашања од сферата на здравствена заштита на пензионерите, за грижата која ја искажуваме кон нив со укинување на квотите за лековите, бесплатна вакцинација против сезонски грип за нив, бесплатно болничко лекување за пензионери со ниска пензија,објави на својот Facebook профил.
Тој додаде дека на средбата станало збор и за ковид вакцинацијата која започна во нашата земја.
-Апелирав дека од голема важност е пензионерите да се вакцинираат, против коронавирусот бидејќи се во најризичната група и најголем дел од нив се со хронични заболувања, пишува министерот Филипче.