На Црвениот плоштад во Москва денес се одржа голема воена парада по повод 77-годишнатата од победата на Советскиот Сојуз над нацистичка Германија, како и прослава на Денот на победата над фашизмот.
Иако овој настан се одржува секоја година во Руската Федерација, годинешната церемонија беше во фокусот на светската јавност поради односот меѓу Запад и Русија, како и војната во Украина.
Парадата започна со марш со знамето на Русија, знамето на победата кое во Берлин го подигнаа советските војници во 1945 година. Војниците традиционално на почетокот беа поздравени од министерот за одбрана Сергеј Шојгу, а по воведниот дел пред присутните се обрати и рускиот претседател Владимир Путин кој се осврна на успесите на советската војска во Втората светска војна и ги спореди активностите кои руската војска ги врши денес на подрачјето на Украина.
По говорот на Путин следеше продолжение на церемонијата на Црвениот плоштад во Москва, каде продефилираа бројни единици на руската војска.
На парадата учествуваа 11.000 војници од сите делови и воени окрузи на Руската Федерација, пренесе RT.
Во текот на дефилето беа претставени и оклопни возила, како и ракетен систем Искандер, ракетен систем Торнадо-Г, како и ракетни системи земја-воздух Тор-М2, С-400 и интерконтиненталната балистичка ракета Yars.
Поради лошите временски прилики, оваа година од Кремљ соопштија дека нема да бидат прикажани борбените авиони и хеликоптери. На церемонијата свој перформанс требаше да има и така наречениот авион „Судниот ден“, наменет за носење руско вооружување во случај на нуклеарна војна, но тоа не се случи.
На завршниот дел од церемонијата Путин заедно со Шојгу положи цвеќе на Гробот на непознатиот војник со што заврши парадата на победата во Москва.