Роман Абрамович, рускиот милијардер кој беше принуден да го продаде Челси поради неговата блискост со Владимир Путин, долго време не се појавуваше во јавноста, а сите беа шокирани од неговото појавување, снимено во видео што вчера се појави на социјалните мрежи.
Абрамович до пред неколку недели беше еден од најпочитуваните бизнисмени во светот, но по санкциите кои многу европски земји ги воведоа кон Русија и руските олигарси, тој е во незавидна положба.
Неодамна на клупската веб-страница објави дека ќе го продаде Челси, но никој го немаше видено во јавност до вчера кога минувачи успеаја да го препознаат на аеродромот во Тел Авив и покрај тоа што изгледаше непрепознатливо. На социјалните мрежи набрзо почнаа да кружат снимки и фотографии.
Абрамович (55) се чини целосно побелел во косата и вистинско чудо е како граѓаните успеале да го препознаат.
Тој во изминатите денови беше во Израел, но очигледно е дека не можеше да остане таму иако има израелски пасош, па од Тел Авив полета за Москва за да пренесе две јахти и 14 авиони во Русија.
Една од јахтите –Solaris - вредна неверојатни 500 милиони евра, привремено била стационирана во Тиват, Црна Гора, но тргнала кон Русија за да не биде запленета, што сè почесто се случува со јахтите на руските олигарси кои се погодени од санкциите.