Македонскиот фудбалски прволигаш Академија Пандев се засили за продолжение на сезоната со аргентинскиот фудбалер Федерико Акоста.
Новото јужноамериканско засилување на струмичкиот прволигаш е 26-годишен централен дефанзивец, кој претходно во кариерата настапувал за италијанските нисколигаши Академија Боргоманеро, Палмезе, потоа Бока Гибралтар од Гибралтар, додека во родната Аргентина излегол од клубот Вижа Далмине.
Акоста доаѓа во редовите на Академија Пандев од редовите на Бавено, клуб кој се натпреварува во групата Пиемонте-Вале д'Аоста во лигата Ечеленца, односно втората аматерска лига во Италија или вкупно 5-та зад Серија А, Серија Би, Серија Чи и Серија Ди.
По воведните четири кола во новата сезоната во 1.МФЛ фудбалерите на Академија Пандев се шестопласирани со 4 бода. Наредниот натпревар на струмичкиот клуб е веќе утре кога го пречекува Скопје од 16 часот. Дали Акоста веднаш ќе дебитира, останува да видиме утре.
