Премиерот Зоран Заев смета дека нема недостатоци во Законот за јазиците и по ветото од претседателот Ѓорге Иванов. Заев денес во Струга, одговарајќи на новинарски прашања рече дека треба да имаме доверба во системот и нагласи дека решенијата во Законот апсолутно не се фалични, како што ги нарече претседателот Иванов.
„Се што е донесено во рамките на законот за унапредување на јазиците е согласно амандманот 5 од Уставот на Република Македонија. Јас уште еднаш ја испраќам пораката дека е вредно да се заложиме за едно општество за сите. Ова е наша мајка Македонија, на сите граѓани, без разлика на нашата етничка, религиска, па дури и политичка определба. Треба да подадеме рака, да имаме доверба во институциите на системот. Се надевам дека ако нешто не е буквално во согласност со Уставот, постои Уставен суд, Венецијанската комисија ќе го каже своето мислење, но и да внимаваме сите со пораките, поради тоа што навистина треба и ова политичко прашање конечно да спласне, да се посветиме на подобар живот и подобри перспективи за сите граѓани“, рече премиерот.
Претседателот Иванов вчера изјави дека поради недостаток на време и волја се нудат фалични решенија за правосудниот систем и за системот за национална безбедност, се носат решенија кои се контрапродуктивни кои наместо соживот носат поделби.
Во средата претседателот Иванов одлучи да не го потпише указот за прогласување на Законот за употреба на јазиците и го нарече репресивен и противуставен.