Албанската опозиција во македонскиот парламент, односно Алтернатива, Движењето БЕСА и Демократското движење (партијата на огнените од ДУИ), го обвинија Али Ахмети за промена курсот на најголемата албанска партија во државава.
По вчерашното интервју на Али Ахмети, каде што се мачеше да покаже дека знае македонски јазик, сакаме да го соопштиме следното: Mожеби е време за следната теза – ДУИ го пушта СДСМ низ вода и почнува кампања за да им се допадне на Левица и на ВМРО-ДПМНЕ, велат од трите албански партии.
„Дали заштитата на нелегално стекнатиот имот на првенците на ДУИ им е помил од почетокот на ЕУ преговорите? Што е следно, екипата околу Ахмети да станат комити? Наградното прашање е дали Ахмети ќе зборуваше македонски ако не се здружеше албанската опозиција?“, прашуваат.
Додаваат дека оваа политичка перверзија на ДУИ ќе биде казнета од Албанците.
„Не одлучува ниту СДСМ ниту ВМРО-ДПМНЕ, туку Албанците одлучуваат кој ќе го претставува нивниот глас по следните избори“, се прецизира во соопштението.
