Италијанскиот гигант синоќа беше понижен и елиминиран од Лигата на шампионите губејќи со убедливи 0:3 од Виљареал среде Торино.
Откако првиот натпревар во Шпанија заврши 1:1 сите го видоа Јувентус како поминува во четвртфиналето со победа на домашен терен. Но, се случи спротивното. Прво во 78. минута штотуку влезениот Жерард Морено реализираше пенал носејќи предност за „Жолтата подморница“. Седум минути подоцна нов шок за Јуве откако Пау Торес погоди за 0:2, гол кој веќе им стави дознаење на навивачите на Јуве дека тука е крајот. Да биде резултатот уште попонижувачки за домашните се погрижи Арно Груневелд во судиското надполнување, вторпат од белата точка.
Но, за стратегот на „Старата дама“ тоа не е неуспех. Тој застана во одбрана на својот тим и покрај високиот пораз.
„Тимот играше добро 75 минути. Во второто полувреме Виљареал само се бранеше, со 9 играчи стоеја зад линијата на топката, не се обидуваа ниту да тргнат во контранапад. Имаа една шанса и ја искористија. Таков е фудбалот - една епизода може сѐ да промени“, рече Масимилиано Алегри во изјава за новинари.
„Имавме добри шанси во првото полувреме, помалку во второто бидејќи Виљареал почна да се брани со 11 играчи, јасно обидувајќи се да го однесе натпреварот во продолженија. Тој гол промени сѐ“.
„Има 10 тимови во Европа кои се на подобро ниво од Јувентус. Тоа не е срамота, тоа е реалност. Не е фер да кажеме дека ова е неуспех. Разочарани сме, но не можам за ништо да им замерам на играчите. Ја знам вредноста на тимот. Јас секогаш стојам цврсто на земја и го вреднувам она со коео располагам“.
Со испаѓањето на Јувентус, а бидејќи претходно во истава фаза испадна и Интер (од Ливерпул), нема повеќе италијански тимови во Лигата на шампиони.
