Милански Интер со заедничка согласност го раскина договорот со чилеанскиот напаѓач Алексис Санчес, соопштија од клубот.
Италијанските медиуми пренесуваат дека 33-годишниот Санчес на слободен трансфер ќе му се приклучи на француски Олимпик од Марсеј, предводен од хрватскиот тренер Игор Тудор.
Санчес одигра 109 натпревари и постигна 20 гола во сите натпреварувања откако дојде во Интер од Манчестер Јунајтед во 2019 година, но ретко беше во стартниот тим минатата сезона.
„Клубот сака да му се заблагодари на Алексис од сѐ срце за последните три сезони, во кои 'Нераѕурите' освоија три големи трофеи и му посакуваме сè најдобро во неговата понатамошна кариера“, се вели во соопштението на Интер.
Поранешниот напаѓач на Барселона и Арсенал, кој одигра 146 натпревари за чилеанската репрезентација постигнувајќи 48 гола, го освои Скудетото со Интер во сезоната 2020/2021, што беше прва шампионска титула за Интер после 11 години, а минатата сезона му помогна на клубот да победи во Купа Италија и Суперкупот.