Тимот на САД го победи Тимот на останатиот свет со 161: 144 во натпреварот на „ѕвездите во подем“ на НБА. Дуелот по традиција е еден од најнеизвесните настани од програмата на Ол стар викендот кој оваа година се одржува во Шарлот.
Одбраната очекувано беше во заден план, особено во првото полувреме, откако двата состави понудија на гледачите атрактивни изведби и покажаа дека иднината на НБА дефинитивно е светла.
Кајл Кузма беше избран за МВП, кој ја игра втората сезона во Лос Анџелес Лејкерс. Крилото ги демонстрира своите квалитети и беше најпрецизен кошаркар во средбата со 35 поени, додавајќи кон нив 6 скока, 2 асистенции и 1 блок. 30 поени за САД додаде и крилото на Бостон Селтикс, Џејсон Тејтум, а плејмејкерот на Атланта Хокс – Треј Јанг постигна 25 поени, 10 асистенции и 7 скока.
Со 20 поени, 9 асистенции, 7 скока и 5 украдени топки пак импресионираше бекот на Јута Џез, Донован Мичел, апоинт бекот на Сакраменто Кингс – ДиАрон Фокс беше играчот со најмногу асистенции од двата тима – 16, а кон нив додаде и 5 украдени топки.
Најпрецизен за странците беше австралиската ѕвезда на Филаделфија 76-ерс, Бен Симонс со 28 поени, а кон нив, тој додаде 6 асистенции, 5 скока и 3 украдени топки. Со 21 поен заврши финското тешко крило на Чикаго Булс – Лари Марканен. Словенечката ѕвезда на Далас Маверикс, Лука Дончиќ пак преферираше да подава и запиша 9 асистенции, истакнувајќи и 13 поени.
