Воздухопловните сили на САД и компанијата Northrop Grumman заеднички го претставија стелт нуклеарниот бомбардер B-21 Raider, а сега се објавени две нови фотографии.
Презентацијата се одржа во присуство на поканети гости, додека јавно беше објавена само една фотографија. Меѓутоа, сега американското воено воздухопловство објави уште две нови фотографии од авионот за кој се знае многу малку.
Авионот вреди 692 милиони долари и е познато дека ја заменува американската флота на бомбардери со нуклеарно оружје. Новите фотографии го покажуваат авионот поблиску и појасно.
Според американските воздухопловни сили, B-21 Raider ќе обезбеди „далечни, продорни ударни способности за да се одврати агресијата и стратешките напади против САД, сојузниците и партнерите“. Според тврдењата, B-21 Raider „дефинира нова ера во технологијата и силата на мировната улога на Америка преку одвраќање“.
Новиот бомбардер има најсовремени способности за вештачка интелигенција и е дизајниран да извршува мисии на долг дострел од територијата на САД со минимални барања за полнење гориво. Технологијата за вештачка интелигенција овозможува операции без екипаж.
Две нови фотографии откриваат и дека дизајнот на бомбардерот B-21 Raider е инспириран од дизајнот на бомбардерот B-2 Spirit. Сепак, главната разлика, освен напредната технологија, е и сиво-белата боја која е поефективна од претходната кај авионите B-2. Исто така, B-21 има повеќе закривени прозорци на пилотската кабина за подобро да ги растера рефлектираните радарски сигнали.
Воздухопловните сили на САД ќе купат најмалку 100 бомбардери B-21 Raider, а првиот ќе стапи во употреба во 2027 година. Новите бомбардери се очекува да ги заменат бомбардерите B-18B Lancer и B-2 Spirit до 2040 година, како и B-52 Stratofortress околу 2050 година.