Бројот на Американци кои побарале бенефиции за невработеност минатата недела падна на најниско ниво во повеќе од 52 години, покажаа вчера податоците на Министерството за труд.
Во неделата, заклучно со 4 декември, барање за државен надоместок за невработеност поднеле 184.000 граѓани, што е намалување за 43.000 во однос на неделата претходно, покажуваат сезонски прилагодените податоци на Министерството за труд.
Ваквиот пад на нивниот број, на најниско ниво од септември 1969 година, веројатно сè уште е надуен поради тешкотиите во прилагодувањето на податоците за сезонските флуктуации.
Нов економски моментум во четвртиот квартал
Иако бројот на апликации обично расте во постудениот дел од годината, економистите велат дека е малку веројатно дека таквата сезонска шема ќе опстојува во периодот на акутен недостиг на работна сила на пазарот на труд во САД.
На крајот на октомври имаше 11 милиони непополнети работни места во САД, така што работодавците не се склони кон отпуштања.
„Сезонските осцилации ќе ја отежнат интерпретацијата на податоците за барањата за бенефиции за невработеност“, рече Вероника Кларк, економист во CityGroup во Њујорк.
Сепак, податоците се во согласност со другите показатели, како што се оние за потрошувачката, производствените и услужните активности, кои сигнализираат продолжување на економското закрепнување во четвртиот квартал по забавувањето меѓу јули и септември.
Невработеноста во ноември падна на 4,2 отсто
Ширењето на омикрон варијантата на коронавирусот сепак може да ѝ наштети на економијата. Иако малку се знае за неговото влијание, може да се очекува помала вработеност и побарувачка за услуги, судејќи според искуството со делта варијантата, што предизвика најслаб раст на економијата за повеќе од една година во третиот квартал.
Владата кон крајот на минатата недела објави дека стапката на невработеност паднала на 4,2 отсто во ноември, што е најниско ниво во последните 21 година, додека бројот на вработени се зголемил за само 210.000, најслаб од пандемијата во декември 2020 година, потсетува Reuters.
На почетокот на април 2020 година, во екот на пандемијата на коронавирус, кога економијата беше речиси целосно запрена, бројот на неделни барања за бенефиции за невработеност достигна рекордни 6.149 милиони.
