Глобалниот бес поради руската инвазија на Украина минатата година само ги разоткри „двојните стандарди“ на Западот кон кршењето на човековите права ширум светот, соопшти денеска Amnesty International.
Во својот годишен светски извештај за 2022 година, Amnesty International укажа на, како што го опиша, молкот на Западот за правата во Саудиска Арабија, репресијата во Египет и постапувањето на Израел кон Палестинците.
„Силичниот одговор на Западот на руската инвазија на Украина ги истакна двојните стандарди, разоткривајќи колку безначајни биле нивните реакции на толку многу други прекршувања на Повелбата на ОН“, рече генералниот секретар на Amnesty International, Агнес Каламард, додека го промовираше светскиот извештај на групата во Париз.
„Рускиот напад, кој започна на 24 февруари 2022 година, ни даде многу редок увид на тоа што е можно кога постои политичка волја да се дејствува, додека Западот ги затвора редовите за поддршка на Украина“, додаде таа.
По инвазијата, многу земји воведоа санкции кон Москва и ги отворија границите за украинските бегалци, а Меѓународниот кривичен суд започна истрага за воени злосторства во Украина.
Amnesty International соопшти дека конфликтот ги истакна недостатоците во одговорот на кршењето на правата во другите делови на светот, како и „заглушувачкиот молк на Западот за состојбата со човековите права во Саудиска Арабија, неактивноста кон Египет и одбивањето да се соочи со израелскиот систем на апартхејд против Палестинците“.
