Селекторот на македонската фудбалска репрезентација жали што Македонија нема да биде домаќин на финалниот бараж натпревар за пласман на ЕУРО 2020, но на крајот тоа сепак не значи ништо.
Каде ќе се игра финалето на крајот на краиштата ќе биде небитно доколку Македонија не го победи Косово во полуфиналето. Тоа најдобро го знае селекторот Игор Ангеловски. А токму тој натпревар го играме на домашен терен, во Скопје.
„Жрепката не беше на наша страна, финалето ќе се игра во Грузија или Белорусија, но за да се пласираме таму мора да мислиме на првиот натпревар. За нас најважен е тој натпревар со Косово каде што треба да бидеме максимално подготвени“, вели Ангеловски за официјалната веб-страница на Фудбалската федерација на Македонија.
Доколку го минеме Косово, ќе играме финале со победникот од другото полуфинале, Грузија или Белорусија и тоа на теренот на противникот. Грузија важи за благ фаворит на тој дуел.
„Што се однесува до финалето, мислам дека е помалку важно каде се игра бидејќи мотивите се огромни. Или, ако немавме среќа на извлекувањето, очекувам да имаме среќа на самите натпревари“, заврши селекторот.
Полуфиналето против Косово е закажано за 26 март 2020 на Националната Арена „Тоше Проески“ во Скопје со почеток од 20.45 часот.
Финалниот натпревар кој ќе го даде патникот на Европското првенството од Лигата на Ц ќе се игра на 31 март.