Апелационен суд Скопје како неосновани ги одби жалбите на обвинетите Бојан Јовановски и поранешната специјална обвинителка Катица Јанева за случајот „Рекет“ и ја потврди првостепената пресуда.
-Апелациониот суд Скопје, постапувајќи по кривичниот предмет КОКЖ -91/20 познат во јавноста под името „Рекет“, донесе одлука со која жалбите на обвинетиот Бојан Јовановски од Скопје и обвинетата Катица Јанева од Скопје, ги одби како неосновани, а првостепената пресуда ја потврди. Вака донесената одлука ќе биде објавена во целост на веб страната на судот во рокот определен со Законот за управување со движењето на предметите во судовите, информираат од Апелационен суд.
Апелациониот суд Скопје ги потврди 7-годишната затворска казна на Јанева и 9-годишната на Бојан Јовановски – Боки 13 за случајот „Рекет“. Во моментов двајцата се во куќен притвор, но сега откако стана правосилна пресудата, ќе мора да одат во затвор, со оглед на висината на нивните казни, објави SDK.MK.
Јовановски и Јанева беа прогласени за виновни во јуни лани. Боки 13 е осуден за примање награда за противзаконито влијание и за перење пари, а Јанева 7 години за злоупотреба на службената положба и овластување како специјална јавна обвинителка.