Екипажот на аргентинската подморница што исчезна на 15 ноември настрадал на лице место, во експлозија која сосема го уништила пловилото.
Според аналитичарот Брус Рул, подморницата била уништена за 40 милисекунди, во експлозија чијшто еквивалент е активирање на повеќе од пет тони ТНТ експлозив.
„Иако екипажот можеби знаел дека ќе се случи трагедија, тие не биле свесни што се случува. Не почувствувале болка, ниту давење“, наведе Рул.
Во петокот властите соопштија дека ја прошириле територијата низ која трагаат по подморницата, наведувајќи дека тоа сега изгледа како да бараат „цигара на фудбалски терен“.
Екипажот на подморницата во последниот контакт навел дека вода продрела во пловилото низ цевка за докот на воздухот, по што веројатно дошло до експлозија.
Аргентинскиот министер за одбрана Оскар Агуад денеска изјави дека меѓународните нуклеарни агенции откриле дека најверојатно имало експлозија во која загинале сите 44 членови на екипажот на подморницата што исчезна во Атлантскиот Океан.
Агуад додаде дека можно е да станува збор за лошо одржување на подморницата.
„Немаме јасни докази, но има сомневања што укажуваат на корупција“, рече тој.
Медиумите објавија дека две германски компании се сомничат за снабдување на Аргентинската морнарица со неквалитетни делови. Во тие делови спаѓаат батерии кои наводно предизвикале краток спој што довел до експлозијата.
„Ferrostaal“ and „EnerSys-Hawker“ се двете компании што се сомничат дека ги снабдиле дефектните батерии за подморницата „Сан Хуан“ преку нејасна корупциска измама, објавија германските медиуми „Bayerischer Rundfunk„ and „ARD“.
Подморницата доби огромно реновирање во 2011 година со кое се очекуваше да биде во употреба уште 30 години. Реновирањето вклучуваше замена на 964 батерии.
Двете компании потпишале договор вреден 5 милиони евра за испорака на резервните делови, но можно е да ги обезбедиле преку корумпирани канали, тврдат медиумите.
„Постои сомневање дека батериите што биле ставени како замена не биле со оној квалитет што се очекувал“, изјави Корнелија Шмит-Лирмен, шефица на комисијата за надворешни работи на аргентинскиот Парламент.
