Џулијан Асанж, кој од 2010 година објави стотици илјади доверливи американски документи како администратор на веб-страницата за укажувачи, оваа недела беше ослободен од британски затвор.
52-годишникот отпатува на Северните Маријански Острови, територија на САД во Тихиот Океан, за да се изјасни за виновен по едно обвинение за заговор за добивање и ширење информации за националната одбрана.
Во средата, тој беше осуден на пет години и два месеци затвор, казна во која му беше вклучено времето што го помина зад решетки во Британија додека се бореше за екстрадиција во САД.
„Ќе можеш да излезеш од оваа судница како слободен човек“, му рече судијката на Асанж, додавајќи дека се надева дека договорот ќе му врати одреден „мир“ по неговото затворање.
Со текот на годините, Асанж стана херој на активистите за слобода на говорот, но и негативец на оние кои мислеа дека им се заканува на американските безбедносни и разузнавачки извори.
Тој не им се обрати на медиумите додека го напушташе судот, а неговиот авион набрзо полета за Канбера, каде што ќе се сретне со семејството.
„Работејќи како новинар, го охрабрив мојот извор да достави материјал за кој се вели дека е доверлив“, изјави Асанж пред судот.
Неговата адвокатка, Џен Робинсон, по сослушувањето изјави дека тоа е „историски ден“ кој „завршија 14 години правни битки“.
„Тоа, исто така, го затвора случајот што беше препознаен како најголема закана за Првиот амандман во 21-от век“, им рече таа на новинарите, нарекувајќи го решението „големо олеснување“.
Северните Маријански Острови беа избрани поради неподготвеноста на Асанж да оди на американско копно и нивната близина со Австралија.
Австралискиот премиер Ентони Албанес рече дека сослушувањето за вина е „добредојден развој“.
WikiLeaks на платформата Х објави дека договорот за признавање „никогаш не требало да се случи“.
Поранешниот потпретседател на САД, Мајк Пенс, остро го осуди договорот за признавање вина како „неправилен пропуст“ кој „ја обесчестува службата и жртвата на мажите и жените од нашите вооружени сили“.
Американските власти сакаа да му судат на Асанж за оддавање воени тајни за војните во Ирак и Авганистан.
Тој беше обвинет од американска федерална голема порота во 2019 година по 18 точки од обвинението што произлегуваат од објавувањето на WikiLeaks на многу документи за национална безбедност.
Обединетите нации (ОН) го поздравија ослободувањето на Асанж, велејќи дека случајот покренал „голем број грижи за човековите права“.
Да потсетиме дека објавувањето на договорот дојде две недели пред Асанж да се појави пред судот во Велика Британија за да ја обжали пресудата со која беше одобрена неговата екстрадиција во Соединетите Американски Држави.
Асанж беше притворен во затворот со максимална безбедност Белмарш во Лондон од април 2019 година.
Тој беше уапсен откако помина седум години во амбасадата на Еквадор во Лондон за да избегне екстрадиција во Шведска, каде што се соочи со обвиненија за сексуален напад кои на крајот беа отфрлени.
Материјалот што тој го објави преку WikiLeaks вклучуваше видеоснимка на која се гледа како цивили биле убиени од американски хеликоптери во Ирак во 2007 година. Меѓу жртвите имало и фотограф и возач на Reuters.
Соединетите Американски Држави го обвинија Асанж според Законот за шпионажа од 1917 година, а поддржувачите предупредија дека може да се соочи со затворска казна до 175 години.
Британската влада ја одобри неговата екстрадиција во јуни 2022 година, но во неодамнешниот пресврт, двајца британски судии рекоа дека тој може да поднесе жалба на неговата екстрадиција во САД.
Договорот за вина не беше сосема неочекуван. Американскиот претседател Џо Бајден е под зголемен притисок да се откаже од долгогодишниот случај против Асанж.
Австралиската влада поднесе формално барање за тоа во февруари, а Бајден рече дека ќе го разгледа, што ги зголеми надежите кај поддржувачите на Асанж дека неговата искушение може да заврши.