Авион на американската морнарица ја прелета пистата и слета во залив на Хаваи. Властите соопштија дека сите девет лица во авионот се неповредени. Крајбрежната стража реагираше, но спасувачките операции беа брзо прекинати, потврди офицерот Рајан Фишер, портпарол на крајбрежната стража.
Авионот P-8A ја прелета пистата во базата на маринци во заливот Канеохе, изјави наредникот Орландо Перес, портпарол на американските маринци. Тој немаше дополнителни информации. Фотографијата направена од сведок го покажува авионот на вода веднаш до брегот, сцена која потсетува на Чудото на Хадсон од 2009 година, кога комерцијален патнички авион управуван од Чесли „Сали“ Саленбергер принудно слета на реката во Њујорк.
Тогаш преживеаја сите 155 луѓе во авионот Airbus A320 од летот 1549 на US Airways што го пилотираше Саленбергер. Тој Airbus A320 и овој P-8A се со приближно со иста големина, пишува Associated Press.
Дајан Диркс и нејзиното семејство штотуку се вратиле на пристаништето откако дождливото време го прекинало нивното патување со понтонски брод кога нејзината ќерка забележала авион на морнарицата во водата.
„Трчавме до крајот на пристаништето и направив неколку фотографии“, рече таа. Потоа слушнале сирени од секаде. Диркс вели дека нејзината ќерка имала двоглед за набљудување птици, па можеле да го гледаат авионот и чамците за спасување како пристигнуваат.
Противпожарната служба во Хонолулу добила пријава за авионот веднаш по 14 часот по локално време, изјави портпаролот Малколм К. Медрано. „Во тоа време беше облачно и врнежливо. Видливоста беше околу 1,5 километар“, рече Томас Вон, метеоролог од Националната метеоролошка служба во Хонолулу.
Чудото на Хадсон беше и екранизирано со филмот „Sully“ од 2016 година во режија на Клинт Иствуд и со Том Хенкс во главната улога како капетанот Сали Саленбергер.
