Австралиската сенаторка со домородно потекло Лидија Торп за време на полагањето заклетва за нејзиниот мандат во Парламентот на Австралија ја нарече „колонизатор“ кралицата Елизабета Втора, која формално е лидер на оваа земја.
„Јас, суверената Лидија Торп, свечено и искрено потврдувам и изјавувам дека ќе бидам верна и ќе бидам вистински лојална на Нејзино колонизаторко Височество кралицата Елизабета Втора“, рече Троп со крената рака пред да биде прекината од претседателот на Сенатот и други претставници.
Еден од претставниците рече дека Торп не е сенатор додека не ја даде заклетвата на вистински начин.
Потоа, претседателката на Сенатот Сју Лајнс ја замоли Торп да положи заклетва како што е напишано на картичката, што Торп го направи, држејќи високо крената стисната тупаница.
Торп за сето тоа се осврна на Twitter, пишувајќи „Суверенитетот никогаш не се отстапува“.
Австралија доби независност во 1901 година, откако беше управувана како колонија од Велика Британија повеќе од 100 години. Британската кралица Елизабета Втора е титуларен лидер на Австралија и ја носи титулата кралица на Австралија.
Во земјата има се повеќе барања да се прекинат сите врски со британското кралско семејство и да се прогласи република.
