Алпската и скандинавската земја ги понудија своите престолнини за потенцијалната средба од највисоко ниво помеѓу претседателите на двете водечки светски сили, САД и Русија.
Откако Џо Бајден изјави дека средбата треба да се одржи на неутрален терен во трета земја, Австрија ја понуди својата Виена да биде местото каде ќе се одржи оваа средба.
„Доколку Русија и САД одлучат да одржат самит на претседателско ниво, тоа е за пофалба. Одлуката дали, кога и каде таков самит би се одржал зависи од двете држави. Се разбира, Австрија секогаш ќе биде расположена за вакви преговори на високо ниво“, изјави претставник на австриското министерство за надворешни работи за московската агенција РИА Новости.
И Финска се понуди да биде домаќин на средбата. Синоќа телефонски разговор остварија финскиот претседател Саули Ниинисте и Владимир Путин. Во 2018 година Финска во Хелсинки го одржа самитот помеѓу Доналд Трамп и Путин кој беше оценет како доста непродуктивен.
Историски гледано, Виена многупати била домаќин на средби помеѓу Москва и Вапингтон, а воедно е редовен домаќин на разговорите околу контролата на наоружувањето. Последниот самит на кои беа и САД и Русија во Виена се одржа минатиот јули кога фокусот беше на безбедноста во вселената и нуклеарните оружја.
