Директорот на Salinen Austria AG Петер Унтершпергер бара од Германија, во врска со поскапувањето на гасот, отворање на гасоводот Северен поток 2.
„Американците воопшто не се оштетени од санкциите, тие профитираат од нив, а Германија и Австрија си пукаат во колено“, објасни Унтершпергер за агенцијата APA.
Според него, ЕУ направила големи грешки и смета дека на Украина никогаш не требало да ѝ биде понудено членство во НАТО, но сега не може да се врати назад, бидејќи Европа би го изгубила својот углед.
Веќе во јануари, пред војната во Украина, компанијата го намали производството за 20 отсто поради цената на енергијата. Сега, вели, ситуацијата е уште полоша.
Унтерешпергер рече дека се намалуваат однапред купените количини енергија и дека компанијата е сè поизложена на пазарните цени, кои само делумно може да ги пренесе на клиентите.
„Досега успеавме да проследиме само 10 до 12 отсто, а ни требаат 25 до 30 отсто“, рече тој.
Тој посочи дека производството и натаму е за 20 отсто помало и така ќе остане до крајот на годинава.
И покрај тоа, тој очекува избалансиран до малку позитивен резултат за тековната деловна година.
Унтершпергер смета дека политиката ги оставила бизнисмените на цедило.
„Зошто порано не се префрливме на обновливи извори на енергија? Ако гасот е поевтин, како претприемач не можам да кажам бидејќи е одржлив и ќе купам зелена енергија од фарма на ветер, која е двојно поскапа. Не сум Каритас“, рече тој.
Унтершпергер, исто така, ја критикува австриската влада за воведувањето данок на CO2, што, како што вели, влијае на конкурентноста во споредба со Германија.
„Нашите германски конкуренти добиваат огромни суми на пари, а ние идиотите седиме на суво и мораме да платиме 400 евра за мегават час“, додаде тој во изјава за агенцијата APA.
