Кандидатот на Социјалдемократската партија на Австрија (SPÖ) Бернхард Ојнгер е победник на завчерашните избори за градоначалник на Салцбург. Заменик-градоначалник ќе биде Кај-Михаел Данкл од Комунистичката партија (KPÖ).
Ојнгер и Данкл беа конкуренти во вториот круг од изборите, кои весникот Der Standard го нарече дуел меѓу црвената и темноцрвената. Со оглед на тоа што комунистички кандидат за прв пат влезе во вториот изборен круг во Салцбург, изборот привлече внимание и надвор од Австрија.
Излезноста на изборите беше 46,78 отсто, од кои Ојнгер ја доби довербата на 62,47 отсто од гласачите, додека неговиот противкандидат ја доби довербата од 37,53 отсто од гласачите. Победата на Ојнгер го претставува враќањето на социјалдемократите на власт во Салцбург.
Одличниот изборен резултат во Салцбург го продолжи растот на Комунистичката партија на Австрија, кој започна со нивната победа во Грац во 2021 година. Градоначалничката на Грац, Елке Кар – единствениот комунист на чело на голем европски град – беше прогласена за „најдобар градоначалник во светот“ за 2023 година.
Според Der Standard, пред неколку години беше незамисливо комунистички кандидат да добие речиси 40 отсто од гласовите. Заменик-градоначалникот Данкл истакна дека домувањето треба да биде достапно за секого, како една од целите.
SPÖ и KPÖ ќе доминираат и во градскиот совет. Имено, социјалдемократите ќе имаат 11 мандати, додека комунистите десет мандати. Од друга страна, дотогашната владејачка партија во Салцбург, Австриската народна партија (ÖVP), значително ослабе. По завчерашните избори, бројот на нивните мандати е преполовен на осум, а по број на советнички мандати се трети.
Следуваат Зелените со пет мандати, десничарската Партија на слободата (FPÖ) има четири мандати, додека партиите NEOS (Das Neue Österreich und Liberales Forum) и Salz имаат по еден мандат.
