САД ќе изберат нов - или стар - претседател на 3 ноември, во зависност од тоа дали на изборите ќе победи актуелниот претседател Доналд Трамп или неговиот противкандидат, поранешниот потпретседател Џо Бајден.
Но, изборите во Соединетите Американски Држави се различни отколку во другите земји, а изборите оваа година можно е да бидат и поразлични од досегашните.
На американската политичка сцена апсолутно доминираат две партии - демократите, кои ја претставуваат либерално-прогресивната струја во американската политика и чиј кандидат е Бајден (77) и републиканците, чиј кандидат е Трамп (74) и кои ја претставуваат конзервативната струја. Последен демократски претседател беше Барак Обама (2009-2017), со Бајден како потпретседател, а последниот републикански кандидат пред Трамп беше Џорџ В. Буш (2001-2009).
За волја на вистината, Трамп и Бајден не се единствените официјални кандидати, така што Американците уморни од дуополот на републиканците и демократите ќе можат да гласаат за Jо Јоргенсен, кандидатката на Либертаријанската партија, Хауи Хокинс, кандидат на Зелената партија и за уште седум кандидати, во зависност од државата во која гласаат - вклучувајќи го и раперот Кање Вест. Но, демократскиот и републиканскиот кандидат се единствените кои реално имаат шанса да победат.
Трамп, денеска, во предвечерјето на изборите, е многу активен на социјалните мрежи. Тој објави уште едно видео во кое ги повикува луѓето да гласаат порано.
Тој додава дека тие мора да гласаат лично, а не по пошта, „за да не им бидат украдени гласовите“.
Повеќе од 94 милиони луѓе веќе гласаа, според US Elections Project, предводен од Мајкл Мекдоналд, професор на Универзитетот во Флорида.
Според неговите проценки, најмногу рани гласови дошле од Калифорнија, 11 милиони. Следува Тексас со 9,7 милиони, а Флорида е трета со 8,7 милиони предвремени гласови.
Објавени се резултатите од најновата анкета за испитувње на јавното мислење во шесте држави одлучувачки спроведено од RealClearPolitics:
Флорида: Бајден води со 1,4%
Пенсилванија: Бајден води со 4,3%
Мичиген: Бајден води со 5,1%
Висконсин: Бајден води со 6,6%
Северна Каролина: Бајден води со 0,3%
Аризона: Бајден води со 1,2%
