Се чини деновите на Марио Балотели во Бреша се избројани откако утринава не му било дозволено ниту да се појави на тимската тренинг сесија, иако не задоцнил, напротив, дошол порано.
Денеска за 9:00 часот тимот на Бреша имаше закажано утрински тренинг во Торболе Казаља тренинг центарот. Марио Балотели се појавил 20 минути порано, но од претставник на клубот не му било дозволено да влезе и по краток разговор бил приморан да го напушти центарот.
„Ајде сега кажете дека не сакам да тренирам...“, им рекол проблематичниот Марио на новинарите од кои претходно беше обвинуван дека тренинзите не ги сфаќа сериозно.
Претодно, клупските лекари му забранија да тренира поради гастроентеритис, а од денеска требаше да се врати на зелениот терен. Бреша токму со тоа се правда. Известувањето од лекарите дека Марио може да им се врати на тренинзите, наводно стигнало доцна и одговорните во клубот не го виделе навреме, па затоа не му бил дозволен влез.
Сепак, познат е ставот на претседателот Масимо Челино кој инсистира Балотели да го раскине договорот со Бреша и тоа на штета на играчот, односно клубот да не му ги исплати средствата кои на играчот му следуваат за предвремен раскин.