Енис Барди игра и тренира во Леванте, но со мислите е насочен кон баражот против Косово и она што тој може да донесе, пласман на ЕУРО што е и негов сон.
Играчот од средниот ред беше дел од историскиот пласман на У21 репрезентацијата на Македонија на младинското ЕУРО во Полска во 2017 година, но настап со сениорите е сосема друго, многу поголемо достигнување за секој фудбалер.
За 24-годишниот Барди претстојниот бараж е шанса која доаѓа еднаш во кариерата и која не смее да се испушти.
„Оваа година е многу важна за мене, за Леванте и за мојата репрезентација. Со репрезентацијата во март имаме два натпревара. Дај Боже да го минеме првиот. Тоа се историски натпревари за сите нас бидејќи за првпат Македонија може да се квалификува на ЕУРО. Ова е огромна прилика и се надевам дека ќе ја искористиме и ќе се пласираме бидејќи ваква шанса доаѓа еднаш“.
Македонија прво на 26 март игра дома против Косово, а доколку победи потоа следува финале против Грузија или Белорусија на 31-ви на гостински терен.