Играчот на Интер заслужено ја доби наградата за играч од средината на годината од La Gazzetta dello Sport.
„Беше неверојатна година, но сѐ почна со поразот во финалето од Лига Европа. Од тој момент почнавме нешто кое трае до ден денес“, вели тој.
Николо Барела потоа го освои Скудетото со Интер, а со Италија триумфираше на ЕУРО 2020. „Нераѕурите“ сега се лидери во Серија А со бод предност пред градскиот ривал Милан.
„Има поголема конкуренција отколку лани, но ние имаме нешто плус од останатите. Имаме свесност и искуство, знаеме како да победуваме бидејќи веќе го имаме направено тоа. Тоа го чувствуваме на теренот, а го чувствуваат и нашите противници“.
Но, како Интер се подобри откако Антонио Конте си замина?
„Инѕаги ни остава повеќе простор за слободна игра. Не ме сфаќајте дека Конте нѐ форсирал да правиме нешто. Но, харизмата на Инѕаги прави сите да се чувствуваат инволвирани, оставајќи нѐ да носиме самите одлуки. И тоа како ни требаше такво нешто после две сезони во кои секогаш следевме еден ист концепт“, ја објаснува разликата помеѓу двата стратега.
Интер минатово лето остана без двајца од своите најдобри играчи: голгетерот Ромелу Лукаку и латералниот бек Ашраф Хакими.
„Неколкумина си заминаа летоска, но донесовме други големи фудбалери. Сакаме да покажеме дека сѐ уште сме најдобри“.
Барела беше виновникот поради кој Интер загуби од Реал во последното коло од фазата по групи во Лигата на шампионите и поради тоа како втор влезе во жрепката, каде го доби Ливерпул. Барела поради црвениот картон нема да може да игра на првиот натпревар, а доколку казната е само еден натпревар суспензија, ќе може да игра на реваншот. Одлука допрва треба да донесе УЕФА.
„Во првите 60 минути доминиравме во Мадрид и потоа направив глупост која ни ја уништи играта. Се надевам дека ќе можам да играм на реваншот“, се надева тој.
