Откако кончено доби дозвола од градските власти, каталонскиот гигант ќе почне со реновирање на својот дом „Камп Ноу“, што значи дека ќе мора да бара привремен стадион за домашните натпревари.
Сезоната 2023/23 Барселона ќе ја игра надвор од препознатливиот „Камп Ноу“, потврдија од клубот денеска. Се знае и привремениот дом, а тоа е стадионот „Олимпик“.
„Камп Ноу“ е отворен во далечната 1957 година и моментално е најголем стадион во Европа со капацитет од 99.354 гледачи. Реновирањето најмногу ќе биде на третиот спрат кој наредното лето ќе биде срушен.
„Реновирањето на 'Камп Ноу', епицентарот на проектот Espai Barça, ќе почне сега во јуни веднаш штом ќе заврши сезонава, а во соглансост со дозволата за градба добиена утринава. Работите ќе бидат изведувани на првиот и вториот спрат, технолошките аспекти, околината на стадионот и надворешната урбанизација“, стои во клупското соопштение.
„Работите внатре во 'Камп Ноу' ќе вклучуваат рушење на додатната структура во зоната Јужен Гол каде порано се наоѓаше медицинскиот центар, потоа ќе има реставрациски работи, анти-карбонација и хидроизолација на трибините, како и структурни завршетоци и подобрување и реновирање на системите за реемитување“.
Овие интервенции нема да бидат проблем за тимот наредната сезона 2022/23 да ја игра на „Камп Ноу“, но затоа понаредната 2023/24 ќе мора да ја игра на друг стадион бидејќи рушењето на дел од трибините не дозволува активна игра во добар капацитет.
„Рушењето на третиот кат ќе почне летото 2023 година, со што ќе добиеме и на време со оглед на менливите цени во моментов, а ќе ни овозможи 'Камп Ноу' да функционира со цел капацитет нареднава сезона. Рушење порано од тоа ќе значеше сезоната 2022/23 да мора да ја играме со само 50% капацитет“.
Барселона таа сезона ќе ја игра како домаќин на стадионот „Олимпик Љуис Компањс“, кој последен пат беше реновиран во 1989 година и беше главен стадион на Летните олимписки игри во 1992. Овој стадион не е ничиј дом, а порано на него играше локалниот ривал Еспањол (од 1997 до 2009), како и Барселона Драгонс до 2002, тим во американски фудбал. Репрезентацијата на Шпанија нема играно на овој стадион од 2004, а во 2008 таму квалификации играше Андора против Англија. Сега важи за стадион на кој се организираат концерти каде во јуни прво доаѓаат Red Hot Chili Peppers, а потоа во јули и Iron Maiden.