Дефанзивецот на Барселона, Џерард Пике, има намера да се пензионира по крајот на следната сезона и да се кандидира за претседател на клубот веќе во 2021 година, пренесува шпанскиот Mundo Deportivo.
Бидејќи во февруари ќе го прослави неговиот 32 роденден, Пике уште од сега размислува за пензија од активно играње фудбал, но изгледа дека неговата посветеност кон Барселона ќе продолжи и по крајот на играчката кариера.
Поради неговите претседателски амбиции, соиграчите уште одамна го нарекуваат „Претседателот“, а тој е решен да им покаже дека е сериозен во неговите намери. Шпанскиот весник Mundo Deportivo тврди дека Пике веќе разработил план за претседателската кампања во кој е вклучена и иднината на Барселона во годините кои доаѓаат.
Доколку успее да стане претседател на клубот, Џерард Пике ќе се опкружи со неговите долгогодишни пријатели во кои има доверба како на теренот, така и надвор од него. Тој има намера да го постави долгогодишниот капитен Карлес Пујол за технички директор на Барселона, додека дуото Чави – Иниеста би се нашло на тренерската клупа, делејќи ја одговорноста помеѓу нив двајца.
Неговиот најважен проект се смета дека е комерцијализацијата на Ноу Камп. Според Mundo Deportivo, едно од потенцијалните имиња на стадионот би било Вака Вака Камп Ноу, што алудира на песната која неговата сопруга Шакира ја испеа за потребите на Светското првенство во Јужна Африка, „Waka Waka (This Time for Africa)“.
