Францускиот фудбалер Карим Бензема даде интервју за медиумите во Саудиска Арабија и истакна дека животот во муслиманска земја во близина на Мека било најважно кога го напуштил Реал Мадрид.
Многумина беа изненадени кога Бензема една година пред истекот на договорот реши да го напушти Реал Мадрид и да премине во редовите на саудиски Ал Итихад, но сега Французинот објасни зошто го направил тоа.
„Сите муслимани чувствуваат мир во Мека, тоа е извонредно место и јас сум во мир. Саудиска Арабија е муслиманска земја, тие ми приредија топло добредојде, ме пречекаа со раширени раце и почувствував голема љубов“, изјави Бензема и додаде:
„Кога фудбалскиот проект започна во Саудиска Арабија, се чинеше огромен во секој поглед. Сакав да бидам дел од него и да помогнам фудбалот да напредува во оваа земја“.
Бензема во ниту еден момент од интервјуто не зборува за парите како главна причина за промена на фудбалската средина, но како и Кристијано Роналдо уверува дека квалитетот на првенството таму е многу висок.
„Луѓето овде се многу страсни и јас сум задоволен од нивото на фудбал што се игра овде. Во Европа не можевме да гледаме многу фудбалски натпревари од Саудиска Арабија, сега можеме и тоа е одлично“, додаде францускиот напаѓач, кој од Мадрид носи само најубави спомени.
„Многу сум среќен и горд на сѐ што направив во Реал Мадрид, но мислам дека е време да пробам нешто ново во мојот живот бидејќи освоив сѐ со кралскиот клуб“, изјави Бензема.
