Благодарение на брзиот хет-трик на Карим Бензема, Реал Мадрид го исфрли ПСЖ од Лигата на шампионите уништувајќи уште една сезона за амбиционизните „Светци“.
Пари Сен-Жермен допатува во Мадрид со предност од 1:0 од првиот натпревар и беше на добар пат да го задржи водството. Реал имаше повеќе од поседот, но парижаните беа тие кои создаваа шанси. При една таква прилика во 39. минута кога Нејмар го проигра Килјан Мбапе, овој ја искористи нерешителноста на Дејвид Алаба и лошата поставеност на Тибо Куртоа, па ја затресе домашната мрежа носејќи навидум недостижна предност од вкупни 0:2.
Како што течеше времето се чинеше дека Реал е во безизлезна ситуација. Мбапе постигна уште два гола од кои првиот со мајсторски дриглинг, но двата му беа оправдано поништени поради офсајд.
Во 61. минута француската одбрана, најслабиот дел од овој ѕвезден состав, го стави во незавидна ситуација голманот Џиџи Донарума кој во обид да избегне да му биде одземена токата лошо подаде, Винусиус Жуниор веднаш врати до Карим Бензема кој израмни на 1:1.
Потоа во 76. и 78. минута Бензема постигна два еден по друг гола и не само што ја надокнади предноста на ПСЖ, туку и го донесе Реал во водство од вкупни 3:2.
До крајот Реал ја сочува предноста и отпатува во четвртфиналето, рушејќи го сонот на ПСЖ и младиот Мбапе кои имаат уште една разочарувачка сезона во европската елита.
Синоќешните три гола Бензема ги постигна со 34 години и 80 дена, со што стана најстариот играч кој постигнал хет-трик во историјата на Лигата на шампионите, надминувајќи го рекордот на неговиот сонародник Оливје Жиру од декември 2020 година, кога постигна 4 гола.
Исто така, со овие три гола стана третиот најдобар стрелец во историјата на Реал Мадрид со 309 гола, надминувајќи го легендарниот Алфредо Ди Стефано кој има 308. Сега на ред е второпласираниот Раул Гонсалес кој му бега за 14 гола. Кристијано Роналдо е недопирлив со 450 гола во Реал Мадрид.
