Бизнис

Безос ужива со девојката на Вимблдон, работниците на Amazon во штрајк

15. јули 2019 - 15:16 | А.С.

Повеќе од 2.000 работници во седум дистрибутивни центри на Amazon ширум Германија од вчера се во штрајк, барајќи поголеми плати, соопшти синдикатот Верди, со најава дека штрајкот ќе трае најмалку два дена.

Штрајкот под мотото „Нема веќе попусти на сметка на нашата плата“ почна вчера и се поклопи со „Ударниот ден“ на Amazon (Prime Day) кога американската компанија за онлајн продажба им нуди на претплатниците на Prime пакетот дополнителни попусти.

„Додека Amazon популаризира ‘лов на намаливања’ на својот ‘ударен ден’, нудејќи големи попусти, вработените се лишени од заработувачката од која живеат“, изјави Орхан Акман од Верди.

Од Amazon не го наведоа точниот број на вработени кои се во штрајк, но наведоа дека ова нема да влијае на испораката до купувачите.

„Компанијата мора конечно да направи колективни договори за платите во секторите за малопродажба и нарачки преку мејл“, рече Акман.

Amazon управува со 12 магацини во Германија, а вчера соопшти дека планира годинава да отвори уште еден, што ќе донесе повеќе од 2.800 работни места, но со договори на дело.

Додека работниците во Германија штрајкуваат, сопственикот на Amazon Џеф Безос ужива на Вимблдон во Лондон, каде се појави со девојката Лорен Санчез за прв пат откако официјално се разведе.

Коментирај