Аргентинецот Марсело Биелса (67) ќе го преземе кормилото на фудбалската репрезентација на Уругвај. Националниот тим на Уругвај ќе го води најмалку до Светското првенство во 2026 година, соопшти Уругвајската фудбалска асоцијација (АУФ). Биелса и АУФ постигнаа договор, а единствено што недостасува е неговиот потпис на договорот.
„Постигнавме договор, разликите во формулацијата се испеглаа и останува само потпишувањето на договорот“, потврди членот на Извршниот одбор на АУФ, Хорхе Касалес.
На кормилото на поранешните светски шампиони (1930, 1950), Биелса ќе го наследи Уругваецот Диего Алонсо, кој ги напушти „Ла Селесте“ по елиминацијата во групната фаза на Мундијалот во Катар. Во меѓувреме в.д. селектор беше Марсело Броли.
Уругвај ќе биде третата репрезентација која во кариерата ќе ја предводи популарниот Ел Локо. Тој ја водеше Аргентина од 1998 до 2004 година, па Чиле од 2007 до 2011 година.
Неговата последна работа беше во Лидс Јунајтед, кој го тренираше од 2018 до февруари 2022 година, и му беше тренер на нашиот Езѓан Алиоски. Во текот на кариерата раководеше и со голем број клубови, меѓу кои Њуел'с Олд Бојс, Атлас, Америка, Велес Сарсфилд, Еспањол, Атлетик Билбао, Олимпик Марсеј, Лацио, Лил…
Биелса би требало да дебитира на клупата на Уругвај во јуни, на пријателските натпревари против Никарагва и Куба. Јужноамериканските квалификации за Светското првенство 2026 ќе започнат во септември кога Уругвај прво го пречекува Чиле, а потоа гостува кај Еквадор.