Бил Гејтс е еден од најбогатите луѓе на светот. Според податоците на „Forbes“, богатството на основачот на „Microsoft“ е проценето на 89,3 милијарди долари.
Да немал план во животот, немало да стигне до овде, но тврди дека би знаел како да живее и со два долари дневно.
Ако неговата компанија некогаш пропадне, Гејтс вели дека би одгледувал кокошки. Тој е еден од луѓето кои имале прилика да го прошетаат целиот свет и да се запознаат со највлијателните и најмоќните луѓе. Тој исто така се има сретнато и со сиромашните и истакнува дека многу сиромашни семејства почнале подобро да живеат откако почнале да одгледуваат кокошки.
„Тоа е вистинското прашање за речиси една милијарда луѓе кои живеат во екстремна сиромаштија. Не постои еден точен одговор, секако, и сиромаштијата се разликува во различни краишта на светот, но додека работев на терен со организацијата запознав многу луѓе од сиромашни земји кои одгледуваат кокошки. Научив многу за начинот на кој се работи оваа работа“, напиша Гејтс во неговиот блог пост.
Тој додава дека одгледувањето пилиња е добра инвестиција бидејќи кокошките брзо се размножуваат, а во Западна Африка може да се заработат по пет долари по парче.
Исто така, јајцата се здрав прехранбен продукт за целото семејство и богат извор на протеини.
Организацијата за која зборува е „Фондацијата на Бил и Мелинда Гејтс“ што соработува со хуманитарни организации и им помага на луѓето од најсиромашните делови од светот со тоа што им обезбедуваат живина.
„Многу е важно да им овозможиме на фармерите да купат правилно вакцинирани птици што ќе може да се прилагодат на местото на одгледување. Целта е да им помогнеме на 30% од семејствата во супсахарсска Африка за да имаат подобри услови за одгледување живина.“