Милијардерот Бил Гејтс призна дека има направено „луди“ работи во животот, како на пример, пиење вода од септичка јама.
На неговиот LinkedIn профил по повод Светскиот ден на тоалетот, во саботата напиша дека еднаш во шоуто на Џими Фелон пиел прочистена вода направена од фекална кал. Станува збор за тест вода од компанијата Omniprocessor, која водата од канализација ја претвора во чиста вода за пиење.
„Имам правени чудни работи низ годините, пиев вода од септичка јама со Џими Фелон, ја делев сцената со цевка полна човечки измет и осетив како смрди тоалетот. Овие лудории беа смешни, но мојата цел секогаш беше да ги наведам луѓето да се грижат за проблемот од кој се погодени 3,6 милијарди луѓе кои живеат во лоши санитарни услови“, порача Гејтс.
„Благодарение на научниците и на инженерите од целиот свет се приближуваме кон нови решенија кои ќе спречат појава на болести“, додаде тој.