Ни вториот брак не донесе среќа на една од најбогатите жени во светот.
Мекензи Скот, бившата сопруга на Џеф Безос, се разведува од професорот по хемија Ден Џевет по помалку од 2 години брак.
Скот веќе поднела барање за развод во Врховниот суд на округот Кинг во државата Вашингтон. Според документите кои новинарите имаа прилика да ги видат, Џевет не го оспорува разводот, а поделбата на имотот е одредена со предбрачен договор.
Мекензи и Ден се венчаа во тајност со март, 2021 година. Претходно се шпекулираше дека постојат проблеми во нивниот брак кога таа престана да го користи неговото презиме во потписите. На страницата Giving Pledge, на која милијардерите ветуваат дека дел од богатството ќе го подарат на други, неговото презиме повеќе не се појавува покрај нејзиното.
И во нејзината официјална биографија веќе нема ознаки за нејзиниот втор сопруг, иако претходно пишуваше дека Мекензи живее во Сиетл заедно со четирите деца и сопругот Ден.
Ден работеше во престижното приватно училиште Лејксајд во Сиетл. Нејасно е дали се уште е вработен во училиштето бидејќи неговото име не се појавува во именикот на факултетот.
Претходно, Безос беше одушевен што неговата бивша сопруга нашла нов маж и го поддржа нејзиниот избор. Џеф и Мекензи во 2019 година објавија дека се разведуваат, но во животот ќе продолжат како пријатели.
Во брак беа 25 години и заедно имаат три сина и ќерка која ја посвоија од Кина.