Баварскиот производител тврди дека ќе ја преполови цената на батериите за електричните автомобили.
Кој ќе победи во трката за технологија на батерии и исплатлива основа на електрични возила? Денес, Tesla е пред многу производители на автомобили, но „сезоната на лов“ на Tesla започна.
BMW тврди дека веќе ја стигнува и преестигнува Tesla. Шефот на производството на баварскиот производител, Милан Недељковиќ, изјави за Autonews дека BMW е веќе пред Tesla со новите големи батериски ќелии и новата Neue Klasse механичка основа.
Главната причина, како што се наведува, е што BMW со своите нови ќелии ќе ја преполови цената на батериите за електричните автомобили. Новата подобрена литиум-јонска батерија ќе има 30 отсто поголема енергетска ефикасност и брзина на полнење, додека трошоците за производство се само 50 отсто од денешните трошоци.
Новите цилиндрични батерии на BMW имаат дијаметар од 46 милиметри и се слични на лименките за пиво. BMW ќе работи со две различни висини на батерии, едната од 95 милиметри, а другата од 120 милиметри.
Овие батерии имаат помала содржина на кобалт во катодата, додека анодата има повеќе силициум од денешните батерии. Планот е да се користи голем дел од рециклирани материјали и да се намалат емисиите на јаглерод диоксид за 60 проценти во споредба со денешните батерии.
BMW го претстави концептот на својот иден електричен автомобил, Neue Klasse, на Саемот за автомобили во Минхен во септември. Новите механички подлоги на возилото ќе ги намалат трошоците за производство во споредба со денешните автомобили на BMW, кои се изградени на хибридна платформа која може да носи и мотори со внатрешно согорување и електрични мотори.
Neue Klasse претставува и нов дизајн и нов начин на производство на електрични автомобили за BMW. Како што велат од компанијата, тоа ќе биде голем технолошки пробив за BMW.