Боксерскиот спектакл на годината меѓу Дионтеј Вајлдер и Тајсон Фјури остана без победник. Колку и ретко да се случува тоа во светот на боксот, судиите не беа едногласни во својата одлука и така битката меѓу двајцата титани во тешка категорија остана со нерешен резултат.
Еден од судијата пресуди во корист на Фјури – 114:112, вториот даде предност на Вајлдер – 115:111, а трет досуди резултат 113:113, па светската титула во Светскиот боксерски совет (ВБЦ) не доби нов сопственик во „Стејплс Центар“ во Лос Анџелес. Таа останува за Американецот, но сигурно ќе има реванш.
По дуелот, огромен број аналитичари се убедени дека победата требаше да биде за Фјури, бидејќи пласираше почисти удари.
Вајлдер го испрати својот противник двапати во нокдаун – еднаш во 9. и еднаш во 12. рунда. Можеби токму вториот нокдаун го спаси Американецот од пораз, бидејќи беше исклучително тежок и дефинитивно противникот имаше среќа што не остана на земја по оваа ситуација.
Почетокот на мечот беше посилен за Фјури и Британецот беше попрецизен. Вајлдер загуби и многу од свежината во средината на дуелот, но како голем шампион покажа дека кога е потребно, може да се мобилизира.
Тој тргна во напад на крајот на натпреварот и успеа да го собори два пати противникот. Полесно тоа беше во 9. а во 12. Фјури едвај стана на нозе. Јавно тоа ги натера и судиите да не се едногласни во својата одлука и да пресудат исход без победник од битката.
Така големиот боксерски спектакл на годината остана без победник, а во секој случај тоа значи дека Вајлдер и Фјури ќе имаат уште еден судир во 2019 година. Аналитичарите и на Островот, и во САД сепак се категорични дека Британецот бил „ограбен“ од судиите и требаше да биде прогласен за победник на овој меч.
Фјури: Целиот свет виде дека јас го освоив мечот
Тајсон Фјури се врати на одличен начин меѓу големите боксери. Откако помина речиси три години надвор од рингот по победата над Владимир Кличко и многумина го отпишаа од спортот, тој се врати против едно од најголемите имиња во тешката категорија – Дионтеј Вајлдер.
Иако натпреварот заврши нерешено, Британецот е убеден дека тој требал да биде прогласен за победник. Фјури беше пратен на два пати во нокдаун, а вториот пат едвај стана на нозе, но тој, а и аналитичарите во светот, се на мислење дека победата требало да биде за него.
– Целиот свет знае, целиот свет виде дека морав да бидам прогласен за победник. Ова момче има страшни удари, но јас успеав да ги избегнам речиси сите. Се надевам дека ве направив сите горди од она што го видовте во оваа битка. Тој никогаш немаше да ме нокаутира, бидејќи јас играв со сето свое срце во рингот. Колку и пати да ме испратеше на подот, јас повторно ќе станев. Дојдов да победам оваа вечер, изјави Британецот по мечот.
Тој додаде дека сега само едно е сигурно – дека ќе има реванш.
– Двајцата со Вајлдер сме големи шампиони. Јас и ова момче тука сме двајцата најдобри боксери во тешка категорија на целата планета. Сега ќе си одам и ќе обрнам внимание на семејството бидејќи 10 недели јас бев далеку од нив, додаде Фјури по натпреварот.
Уште во рингот, по прогласувањето на судската одлука, тој упати предизвик против светскиот шампион во другите три верзии, Ентони Џошуа и го повика да се бори со него, ако навистина сака да биде сметан за најдобар во светот.
Вајлдер: Требаше да бидам победник, два пати го нокаутирав
Светскиот шампион во ВБЦ серијата, Дионтеј Вајлдер го задржа појасот по натпреварот со Тајсон Фјури, откако битката меѓу нив заврши нерешено во Лос Анџелес.
Според Вајлдер, сепак фактот дека на два пати го испрати својот противник на земја во овој натпревар, би требало да биде прогласен за победник.
– Мислам дека токму заради овие два нокдауна јас сум победникот. И двајцата сме големи воини, ги вложивме срцата во овој натпревар, но поради овие два нокдауна требаше јас да сум победник. Двајцата сме најголемите на светот, спроведовме голем натпревар и јас му се заблагодарам за тоа. Почитта е меѓусебна, изјави Вајлдер.
Тој го анализираше и настапот во натпреварот.
– Почнав полека, слабо. Избрзував со ударите. Не стоев цврсто на рингот. Бев премногу неодлучен. Не удирав добро со десната рака и долго време не можев да се поставам. Такво нешто обично не ми се случува. Не можев да се ослободам од тензиите во почетокот. Премногу ги форсирав ударите, наместо да седам назад и да го почекам да нанесе удар. Навистина сакав да го нокаутирам, за да им даде на луѓето она за што беа дојдени во салата. Кога си под тензии, никогаш не си прецизен во ударите, изјави Вајлдер.
Тој беше категоричен дека ќе има реванш и дека во него ќе победи.
– За мене тоа беше еден голем натпревар и сакам да има уште еден. За мене нема никакво значење каде ќе го спроведеме. Докажавме дека сме двајцата најголеми боксери во тешка категорија. Подготвен сум да го повториме натпреварот и да им го дадеме повторно на навивачите спектаклот, што го сакаат и заслужуваат, додаде Американецот по натпреварот.