Nissan планира агресивно намалување на трошоците за да се справи со неочекуваниот пад во продажбата, откако пропадна стратегијата за проширување наследена од поранешниот претседател Карлос Госн, објави Reuters повикувајќи се на извори блиски до компанијата.
Вториот најголем јапонски производител на автомобили би требало да укине најмалку 4.300 работни места и да затвори два производни погона како дел од пошироиот план за заштеда на најмалку 480 милијарди јени (4,4 милијарди долари) до 2023 година.
Овие потези се приоритетни во планот за пресврт што беше претставен во јули и најверојатно ќе вклучува намалување на понудата на Nissan.
Укинатите работни места се очекува да бидат најмногу во САД и Европа, а се предвидуваат и намалувања на трошоците за рекламирање и маркетинг.
„Ситуацијата е страшна. Тоа е борба за живот и смрт“, изјави изворот на Reuters од високото раководство и управниот одбор.
Поголемиот дел од планираните намалувања и мерки за зголемување на ефикасноста беа претставени пред одборот на Nissan во ноември и добиле одобрување, вели изворот.
Портпаролката на Nissan Motor Co одби да ги коментира мерките за преструктурирање, како и шпекулациите дека тоа се должи на паднатата продажба.
