Борусија Дортмунд и официјално на својата интернет страница објави дека нов играч во клубот е 29-годишниот австриски фудбалски репрезентативец Марсел Сабицер.
Сабицер дојде во Борусија од Баерн, најголемиот ривал во Бундеслигата. Тие две екипи и минатата сезона до последната минута од првенството водеа драматична борба за титулата германски шампион, а Борусија ја загуби предноста во последното коло, а на крајот славеа Баварците.
Челниците на Дортмунд го опишаа Австриецот како „засилување од соништата“.
Сабицер е играч на Баерн од 2021 година, но вториот дел од минатата сезона го мина како позајмен во Манчестер Јунајтед. Борусија изјави дека овој офанзивен играч за врска потпишал договор со клубот од Дортмунд до јуни 2027 година.
Претходно Сабицер играше за Адмира Вакер, Виена Рапид, Лајпциг и Ред Бул Салцбург. Тој одигра вкупно 185 натпревари во Бундеслигата и забележа 34 гола и 29 асистенции. За австриската репрезентација забележа 71 настап со 14 голови.
